«Мың бала» мәдени-ағарту жобасына 320 мың бала қатысты

Астанада мемлекеттік тілді насихаттай отырып, қазақ мәдениеті мен ұлттық дәстүрді дәріптеуге арналған «Мың бала» республикалық мәдени-ағарту жобасы өз мәресіне жетті, деп хабарлады Elorda.info.

Салтанатты шараға ҚХА төрағасының орынбасары – ҚР Президенті Әкімшілігі ҚХА хатшылығының меңгерушісі Марат Әзілханов, Мәдениет және ақпарат вице-министрі Қанат Ысқақов, ҚР Парламентінің депутаттары, этномәдени бірлестіктер мен жастар ұйымының өкілдері, жоба жеңімпаздары қатысты.

Айтулы жоба Мәдениет және ақпарат министрлігінің қолдауымен тоғызыншы рет өтті. Іс-шара аясында еліміздің барлық аймағында «Өнерлі өрге жүзер» және «Жарқыра, жас дарын!» аталымдары бойынша қазақ тілін білуге ​​арналған 6 мыңнан астам іс-шара мен байқаулар өткізілді.

Жиында құттықтау сөз сөйлеген Мәдениет және ақпарат вице-министрі Қанат Ысқақов министрліктің этносаралық бағытта жоғары сапалы қазақтілді контентті дамытуға және жастар үшін біртұтас мәдени кеңістік құруға бағытталған жобалары туралы айтты.

Елімізде мемлекеттік тілді меңгеру үшін барлық жағдай жасалған. Қазақ тілінде көптеген оқулықтар мен оқу-әдістемелік құралдар шығарылады, бейнежазбалар мен аудио подкастар бар. Этникалық топ өкілдерінің мемлекеттік тілді меңгеруіне мүмкіндік беретін жобалардың бірі – «Мың бала» жобасы, - деді Қанат Ысқақов.

Биыл барлығы 320 мыңнан астам бала қатысты. Олардың 35-і жеңімпаз атанды. Қатысушылар мәнерлеп оқу, музыкалық шығармаларын орындау бойынша концерттік нөмірлер қойып, қазақ ақындарының жеке шығармашылығынан өлеңдер оқыды.