Конституция күніне орай елордада аула ашылды

Конституцияның 30 жылдығына орай елорданың Сарайшық ауданында тағы бір абаттандырылған аула салтанатты түрде ашылды, деп хабарлады Elordainfo.kz Астана қаласы әкімдігінің ресми сайтына сілтеме жасап.

Ауланы абаттандыру жұмысы «Халық қатысатын бюджет» бағдарламасы аясында «Аксима» тұрғын үй кешенінде жүргізілді.

Аула аумағында балалар ойын алаңы жаңартылып, қауіпсіз жабын төселді, заманауи шағын архитектуралық нысандар – әткеншектер, өзге де ойын элементтері орнатылды. Сондай-ақ жаңа көшелік жаттығу құралдары бар спорт аймағы жасалды.

Футбол алаңы да кеңейтіліп, ескі тартан жабындысы жаңа жасанды газонға ауыстырылды, периметр бойынша жарықтандыру жүйесі орнатылды. Бұдан бөлек жаңа орындықтар мен қоқыс жәшіктері қойылып, бұрыннан бар абаттандыру элементтері жөнделіп, қайта сырланды.

Мерекелік іс-шарада аниматорлар балалардың көңілін көтеріп, әртүрлі ойындар мен жарыстар ұйымдастырды.

«Мен бұл тұрғын үй кешенінде 2017 жылдан бері тұрамын. Пәтер сатып алу кезінде ауланың әдемілігі үшін бірден таңдағанмын. Бүгін әкімдік бізге жөндеу жүргізіп бергеніне қуанып отырмын. Балалардың бәрі шат-шадыман ойнап жүр. Көп-көп рақмет айтқым келеді және баршаңызды мерекемен құттықтаймын», - деді «Аксима» ТК тұрғыны Қарлығаш Құсманова.

Сарайшық аудандық әкімдігінің абаттандыру бөлімінің басшысы Сұлтан Шаймарданның айтуынша, бұл аумақтағы жұмыс үш аптаға созылған.

«Әрбір аула абаттандырылмас бұрын ПИК/МИБ және белсенді тұрғындармен кездесулер өткізіледі. Алғашқы кездесуде тұрғындардың барлық ұсынысы талқыланады, кейін ортақ түсінік үшін эскиз жобасы дайындалады. Бұл мекенжай бойынша да бірнеше кездесу өткізіліп, барлық мәселе жан-жақты қарастырылды. Барлық ұсыныс ескеріліп, толық орындалды», - деді ол.

Аудандық әкімдік өкілінің айтуынша, мұндай жобалар қала тұрғындарының көңіл-күйіне елеулі ықпал етеді.

«Аулалардың жаңаруы әрқашан тұрғындардың жалпы көңіл-күйіне, ең бастысы балалардың қуанышына оң әсер етеді. Сондай-ақ қария тұрғындар да ерекше разы, себебі уақытын тыныштықта өткізетін аймақтар жасалып, жаңа көше жиһаздары орнатылады. Мұндай жұмыс барысында балалар алаңынан бөлек жарықтандыру, көгалдандыру, асфальт жабындысын жөндеу, «жол полицияларын» орнату және арбамен жүретіндерге арналған пандустар жасау сияқты көптеген мәселе шешіледі», - деп атап өтті Сұлтан Шаймардан.
 

Биыл Сарайшық ауданында 11 аула абаттандырылды.