Елордада қыс басталғалы 800 мың текше метр қар шығарылды

Астанада коммуналдық қызмет мамандары тәулік бойы үздіксіз жұмыс істеп жатыр, деп хабарлады Elordainfo.kz қала әкімдігінің ресми сайтына сілтеме жасап.

2 желтоқсан күндізгі ауысымда қар тазалау жұмыстарына 2,7 мыңға жуық жол жұмысшысы мен 906 арнайы техника жұмылдырылды.

1 желтоқсаннан 2 желтоқсанға қараған түні қар полигондарына 236 ауыр жүк рейсімен шамамен 2,5 мың текше метр қар шығарылды.

Қыс мезгілі басталғалы қаладан 63 мыңға жуық рейс арқылы 800 мың текше метр қар шығарылды.

Ережеге сәйкес, ең алдымен қалада кептеліс болмас үшін өте қарқынды қозғалыс учаскелері тазаланады. Сондай-ақ орташа қарқындылығы бар учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. орындар қардан тазартылады.

Орталық көшелерде, жолаушылар көлігі маршруттарында, аялдамалар мен тротуарларды тазалау басымдыққа ие.

Астанада бірнеше жабдықталған қар полигоны жұмыс істейді. Олар самосвал техникасының нөмірлік белгілерін оқу жүйесімен жабдықталған, онда бейнебақылау камералары орнатылған, жарықтандыру қосылған.

Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарлардан бас тартуды сұраймыз, - делінген хабарламада.

Төтенше жағдай туындаған кезде «112» телефонына хабарласқан жөн.