Елордада «Күйшілер» аллеясы қайта жаңғыртудан кейін ашылды

Астанада Конституция күніне орай ауқымды реконструкция мен жаңғыртудан өткен «Күйшілер» аллеясы салтанатты түрде ашылды, деп хабарлады Elordainfo.kz Астана қаласы әкімдігінің ресми сайтына сілтеме жасап.

Аллея Абылай хан даңғылы бойында орналасқан және аумағы шамамен 25 000 шаршы метрді құрайды.

Қоғамдық кеңістікті күрделі жөндеу екі айға созылды. Мұнда ескі кеспетастар төсемі ұзаққа шыдайтын гранит тасқа ауыстырылып, көгалдандыру жүргізілді, тіреуіш қабырғалар орнатылып, көпжылдық бұталар мен шыршалар егілді. Сондай-ақ заманауи жергілікті суару жүйесі іске қосылды. Автотұрақ аймағы да айтарлықтай кеңейтіліп, асфальтбетон жабыны толық жаңартылды.

Сондай-ақ, воркаут және жаттығу аймақтары, орындықтар мен қоқыс жәшіктері, көлеңкелі шатырлы орындықтар мен ересектерге арналған жайлы беседкалар орнатылды. Аллея аумағында қоғамдық дәретхана да қарастырылған.

«Аллеяға «Күйшілер» атауы қобызда ойнаған көрнекті халық музыканттары мен композиторларының құрметіне берілді. Олардың есімдері қашалып жазылған мәрмәр тақта орнатылып, бұл кеңістікке мәдени мән-мағына мен символикалық мазмұн беріп тұр», - деді Алматы ауданы әкімі аппаратының абаттандыру бөлімі басшысы Данияр Қожахметов.

Айта кетейік, биыл елордада шамамен 170 аула мен қоғамдық кеңістік (саябақтар, гүлзарлар, желекжолдар) абаттандырылып жатыр. Бұл жұмыс барлық ауданды, оның ішінде тұрғын алаптарды да қамтиды. Қазіргі таңда оның басым бөлігі аяқталды.