Елордада Grand Prix Kazakhstan халықаралық ашық турнирі басталды

Садақ атудан еңбек сіңірген жаттықтырушы Светлана Лиді еске алуға Grand Prix Kazakhstan халықаралық ашық турнирі басталды, деп хабарлады Elordainfo.kz.

Төртінші мәрте ұйымдастырылып жатқан бәсекеге классикалық садақ атудан Токио, Париж Олимпиадасының қатысушысы Ильфат Абдуллин, XXXI жазғы Универсиада ойындарының күміс жүлдегері Диана Тұрсынбек және блоктық садақ атудан аралас жұптық бәсекеде әлем кубогының жеңімпазы, Азия чемпионы Андрей Тютюн, Әлем кубогы мен Азия чемпионатының жүлдегері Виктория Лян, Азия чемпионатының жүлдегері Акбарали Қарабаев, Азия кубогының чемпионы Бунед Мирзаметов сынды атақты жерлестерімізбен қатар, Қытай, Германиядан да спортшылар арнайы келді.

«2021 жылдан бері дәстүрлі түрде жарысымыз өтіп жатыр. Биылғы ауқымды турнирімізге 250-ге жуық әуесқой және кәсіпқой спортшылар қатысуда. Басты мақсатымыз - садақ атуды қоғамда барынша таныту. Ұлттық құраманың көшбасшысы Ильфат Абдуллин секілді отандастарымыздың арқасында турнирдің беделі жоғарылап жатыр. Ал марқұм Светлана Ли 2000 жылдары Астана қаласына көшіп келіп, қаланың спортын дамытуға айтарлықтай үлес қосқан. Спортшыларымыз шетелдік додалардан жүлделі орындармен оралып жүр», - деді Астана қаласының садақ ату және дартс федерациясының баспасөз қызметкері Айман Амангелді.

Шынында да кейінгі жылдары садақ атудан ұлттық құрамамыз шетелдік ареналарда жемісті өнер көрсетіп жүр. 2024 жылы блоктық садақ атудан Андрей Тютюн мен Адель Жексенбинова Антальядағы (Түркия) Әлем кубогының 3-ші кезеңінде чемпион атанса, Шанхайда әйелдер құрамасы алғаш рет қола жүлде жеңіп алды. Ал классикалық садақ атудан ерлер құрамасы екінші мәрте қатарынан толық құрамда жазғы Олимпиада ойындарына қатыса алды.

Айта кетейік, турнирдің жалпы жүлде қоры 3 миллион теңгені құрайды.

1-3 қараша аралығында жалғасатын жарыс барысында блоктық садақ ату, Олимпиада бағдарламасына кіретін классикалық ату, аралас командалық сын, 18 жасқа дейінгі классикалық ату сайыстары бойынша жалпы 16 жүлде жиынтығы сарапқа салынады.

Финалдық бәсекелер 3 қараша күні түскі 12:00-де «Хан-Шатыр» сауда орталығында өтеді.