Елордада дәмхана есігін сындырған азамат 15 тәулікке қамалды

Астанада вандализмнің кез келген әрекетіне қарсы күрес жүріп жатыр. Бірер күн бұрын полицейлер қаладағы кафелердің бірінің мүлкіне зиян келтірген адамды жауапқа тартты, деп хабарлады Elorda.info.

Оқиға түнгі сағат бір шамасында Қосшығұлұлы көшесіндегі кафеде болған. Мас адам мекеменің алдыңғы есігін бұзған. Оқиға орнына полицейлер барды. 43 жастағы тұрғын кінәсін мойындап, өкінетінін білдірді. Ол ҚР ӘҚБтК-нің 147-1-1-бабына сәйкес 15 тәулікке қамауға алынды.

Сонымен қатар, тағы бір ер адам күндізгі уақытта Мұхамедханов көшесіндегі үйдің кіреберісінде мас күйінде біреудің мүлкіне зиян келтірген. Сот оған айыппұл салды, - делінген Астана әкімдігінің ақпаратында.

Жыл басынан бері елорда полициясының қызметкерлері вандализмнің 100-ден астам фактісін анықтады. Қалада екі мыңнан астам полиция қызметкері күнделікті патрульдейді.

Айта кетейік, жыл басынан бері Астанада еріктілер, белсенділер, танымал спортшылар, қала тұрғындары қолдау білдірген «Тоқта, вандал» акциясы жұмыс істейді.

Акция аясында қала бойынша күндізгі және түнгі рейдтер өткізіледі, халық арасында қоғамдық тәртіпті сақтау қажеттілігі туралы түсіндіру жұмысы жүргізіледі.