Астанада Сәкен Сейфуллин музейінің қызметкерлері тазалық акциясын өткізді

«Таза Қазақстан» республикалық экологиялық бастама аясында Сәкен Сейфуллин музейінің қызметкерлері тазалық акциясын ұйымдастырып, мәдени нысан айналасын қоқыстан тазартып, ретке келтірді, деп хабарлады  Elordainfo.kz Астана қаласы әкімдігінің ресми сайтына сілтеме жасап.

Сенбілікті елордалық Мәдениет басқармасы ұйымдастырды. Музей қызметкерлері қоқыс жинап, жасыл желектерді ретке келтіріп, жазушы ескерткішінің айналасын тазалады. Қатысушылардың айтуынша, мұндай бастамалар қала өмірі мен өз тарихына деген жауапкершілікті сезінуге ықпал етеді.

«Біз туған қаламыздың тазалығына деген жауапкершілік әрқайсымыздан басталады деп есептейміз. Біз үшін келушілерге тек тарихты баяндап қана қоймай, қоршаған ортаға және ескерткіштерге ұқыпты қараудың үлгісін іс жүзінде көрсету маңызды. Осындай сенбіліктер арқылы жас ұрпаққа патриоттық сезім мен экологиялық мәдениетті дарытамыз», - деді музейдің тарих және мәдени мұра бөлімінің маманы Алуа Тоқтарбаева.

Музей XIX ғасырдағы көне ағаш үйде орналасқан – ерекше назарды қажет ететін сәулет ескерткіші. Акция тарихи кешеннің сыртқы бейнесін жаңартып қана қоймай, қызметкерлерді ортақ мақсат төңірегінде біріктірді.