Астанада қар күреуге 2 мыңға жуық жол жұмысшы шықты

Елорданың коммуналдық қызметтері қар полигондарына шамамен 7 мың текше метр қар шығарды, деп хабарлады Elordainfo.kz  Астана әкімдігінің ресми сайтына сілтеме жасап.

Күндізгі ауысымда қала көшелерінен қар мен мұзды күреуге 2 мыңға жуық жол жұмысшы мен 1,2 мыңнан астам арнайы техника шықты.

7 желтоқсанға қараған түні қар полигондарына 7 мың текше метрге жуық қар 827 ауыр жүк рейсімен жіберілді.

Қыс мезгілінің басынан бастап қаладан 67 753 рейспен 861 мың текше метр қар шығарылды.

Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.

Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.

Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.

Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.

Төтенше жағдай туындаған кезде «112» нөміріне хабарласыңыз.