Көлгінов: Әлеуметтік пәтер алатындар қатарына Төтенше жағдайлар департаментінің қызметкерлері де кіреді

15 тамыз, 2024
Елорда ақпарат Елорда ақпарат
Көлгінов: Әлеуметтік пәтер алатындар қатарына Төтенше жағдайлар департаментінің қызметкерлері де кіреді
ашық дереккөз

«Нұр-Сұлтан қаласы бойынша «Nur Otan» партиясының сайлауалды бағдарламасының негізіне 10 негізгі басым бағыт кірді. Бірінші тармақта жеңілдікпен қолжетімді баспанамен қамтамасыз ету бекітілген. Аталған мәселе бойынша ауқымды, жүйелі жұмыс атқарып жатырмыз, оның ішінде Тұрғын үй құрылыс жинақ банкі және Қазақстан ипотекалық компаниясымен де бірлесе жұмыс атқарудамыз. Біздің өрт сөндірушілер күн сайын ерлік жасайды — қала тұрғындарының өмірін құтқарады. Біз ҚИК-пен бірлесіп, әлеуметтік пәтер алатындар санатын кеңейттік, енді олардың қатарына Төтенше жағдайлар департаментінің қызметкерлері де кіреді. Бұған дейін бұл тізімге әлеуметтік қызметкерлер, полиция, мәдениет және спорт мамандарын да енгізген болатынбыз. Биыл жоғарыда аталған санаттардан өзге ҚИК бағыты бойынша берілетін 1 мың әлеуметтік пәтерге денсаулық сақтау мен білім беру саласының қызметкерлері де үміттене алады», — деп жазады қала әкімі.

Алтай Көлгінов өз сөзінде тұрғын үй сертификаттары берілетінін, оны бастапқы жарна ретінде пайдалануға болатынын қозғап өтті.

«Баспана сатып алуға тағы бір үлкен көмек — тұрғын үй сертификаттары. Оларды бастапқы жарна ретінде пайдалануға болады. Бұл бағыт бойынша да алушылар санатын кеңейттік. Егер бұрын тізімде тек толық емес отбасылар, көпбалалы жанұялар мен мүгедек бала тәрбиелеп отырған отбасылар болса, енді тізімге халықтың әлеуметтік осал топтарының барлық санаты кіреді. Мысалы, олар жетім балалар, 1 және 2 топтағы мүгедектер, зейнеткерлер, ардагерлер мен тағы басқалар. Тұрғын үй сертификаттары 1 млн теңге көлемінде беріледі, оларды «Шаңырақ» (5-10-20) жобасына қатысу үшін пайдалануға да болады. Мемлекет басшысының тапсырмасымен биыл қолжетімді баспана құрылысының көлемі үш есе артты», — дейді астана әкімі.