Пойыздардағы вагон-мейманханалар біртіндеп ашыла бастайды

«Жолаушылар тасымалы» АҚ Қазақстан Республикасының Көліктегі Бас мемлекеттік санитарлық дәрігердің 2020 жылғы 24 тамыздағы № 56 «Жолаушылар пойыздарындағы қоғамдық тамақтандыру объектілерінде шектеу шаралары және оларды кезең – кезеңімен жеңілдету туралы» қаулысына сәйкес, вагон-мейрамханалар, вагон-барлар және купе-буфеттер қызметі іске қосылады. Бұл туралы Елорда Инфо Ұлттық тасымалдаушының баспасөз қызметіне сілтеме жасап хабарлайды. Жолаушылар пойыздарында қоғамдық тамақтандыру объектілерінің қызметі карантиндік шаралар мен санитарлық-дезинфекциялық режимді қатаң сақтай отырып жүргізіледі. Қаулыға сәйкес жолаушылар өз вагонына тамаққа тапсырыс бере алады, сондай-ақ вагон-мейрамханаларының ішінде түскі ас ішуге рұқсат берілген. Алайда бұл тұрғыда вагон-мейрамханаларының толтырылуы 50%-дан артық болмауы тиіс. Ұлттық тасымалдаушы жолаушылар пойыздарында маска режимі бар екендігін, сонымен бірге кемінде 1 метр ара қашықтықты сақтай отырып, вагондар арасында жүруге жолаушыларға рұқсат етілгендігін естеріңізге салады.