Алексей Цой вакцина салдырады ма – министрліктің ресми өкілінің жауабы

ҚР Денсаулық сақтау министрлігінің ресми өкілі Бағдат Қожахметов онлайн брифингте «министр өзіне вакцина салдырады ма, егер салдырса оған бұл қызметі ақылы ма, әлде тегін көрсетіле ме?» деген сұраққа жауап берді, деп хабарлайды Елорда Инфо. «Қазіргі уақытта вакцинаның қашан болатыны белгісіз. Егер вакцина халықаралық тіркеуден өтіп, елімізде қолданыла бастаған кезде Алексей Владимирович те екпені салдыратын болады. Әрине, ол денсаулық сақтау жүйесінің қызметкері болғандықтан, вакцинация қызметі оған тегін көрсетілетін болады. Жалпы, еліміз бойынша жоғары тәуекелмен бетпе-бет келетін 2 мыңнан аса медицина маманына вакцинация тегін жүргізіледі», – деді ол. Оның айтуынша, екпе 65 жастан асқан егде адамдар мен созылмалы ауруы бар азаматтарға, яғни жүрек қан тамыры мен қант диабеті бар науқастарға салынбайды. Сонымен қатар ол министрдің және денсаулық сақтау жүйесі қызметкерлерінің отбасы мүшелері вакцинаны өз қаржыларына қабылдайтынын атап өтті.