Ералы Тоғжанов елордадағы «Antikor ortalygy» жұмысымен танысты

Премьер-Министрдің орынбасары Е.Тоғжанов сыбайлас жемқорлыққа қарсы іс-қимыл агенттігінің елордалық департаментінің «Antikor ortalygy» жұмысымен танысты, деп хабарлайды Елорда Инфо. «Халық үніне құлақ асатын мемлекет» тұжырымдамасын іске асыру аясында Премьер-Министрдің орынбасары Е.Тоғжановқа елордалық Сыбайлас жемқорлыққа қарсы іс-қимыл департаменті жанындағы «Antikor оrtalygy» жұмысы таныстырылды. Іс-шараға Еңбек және халықты әлеуметтік қорғау министрі Б.Нұрымбетов, Нұр-Сұлтан қаласы әкімінің орынбасары Б.Мәкен және Агенттік Төрағасы қатысты. Орталықтың негізгі қызметі қоғаммен ашық алаңда өзара қарым-қатынас жасау және тұрғындармен тиімді кері байланысты қамтамасыз етуге бағытталған. Қабырғалары әйнекпен жабдықталған департамент қызметкерлерінің кабинеттерін көрген қонақтар – бұл бастамалардың ашықтық пен сенімділікті қамтамасыз ететінін атап өтті. Қонақтарға тұрмыстық сыбайлас жемқорлықты жою, мемлекеттік қызметті алу кезінде қолайлы жағдайлар жасау және қоғамдық бақылаудың іске асырылуын қамтамасыз ету мақсатында «Астана - адалдық алаңы» жобасы аясында атқарылып жатқан бастамалар таныстырылды. Сондай-ақ, мемлекеттік мекемелердің бюджет қаражаттарының жұмсалуын онлайн режимде қоғамдық бақылауға мүмкіндік беретін «Ашық бюджеттердің интерактивті картасы» жобасы ұсынылды. Департамент қызметкерлері карантин жағдайында тұрғындармен жедел байланыс орнатуға қолайлы «Antikor.Live» жобасы аясында жүргізілетін тікелей эфирлер мен брифинг студиясының жұмысы туралы айтты. Сыбайлас жемқорлыққа қарсы қызмет жанындағы ақпараттық-ағартушылық штабының жетекшісі Ырза Тұрсынзада қоғамда сыбайлас жемқорлыққа қарсы мәдениетті қалыптастыру, адалдық пен парасаттылық қағидаттарын насихаттау бағытында атқарылып жатқан жұмыстары жөнінде ақпарат берді. Кездесу қорытындысы бойынша Ералы Тоғжанов сыбайлас жемқорлыққа қарсы іс-қимыл департаменті қызметіндегі ашықтық пен қоғаммен сындарлы ынтымақтастықты қамтамасыз етудегі жұмысына оң бағасын берді. Сонымен қатар, бұл тәжірибені ақпараттық алаңдарда кеңінен жариялап, басқа мемлекеттік органдардың жұмысына енгізу қажеттігін атап өтті.