Нұр-Сұлтанда азық-түлік бағасын негізсіз көтерген кәсіпкерлер жазаланды

Елордада әлеуметтік маңызы бар азық-түлікке бағаны негізсіз көтергені үшін «Interfood», «ВкусМарт», «Встреча» супермаркеттерінің басшылары әкімшілік жауапқа тартылды, деп хабарлайды Елорда Инфо тілшісі әкімдіктің ресми сайтына сілтеме жасап. Айыппұл көлемі 100 АЕК (265 мың 100 теңге) құрайды. Әлеуметтік маңызы бар азық-түлік бағасының негізсіз өсуіне жол бермеу және санитарлық нормаларды сақтау бойынша әкімдіктің мобильдік топтары, прокуратура мен монополияға қарсы орган қызметкерлері бірлесіп, рейдтер жүргізіп жатыр. Нұр-Сұлтан қаласының әкімдігі әлеуметтік маңызы бар азық-түлік бағасының негізсіз өсуіне жол бермеу, қаладағы карантин және төтенше жағдай режимі кезінде санитарлық нормаларды сақтау бойынша шаралар кешенін қабылдады. «Айналым схемасы» жобасына «Magnum», «Астықжан», «Кеңмарт», «Small», «Шапағат», «Евразия», «Артем», «Биг Шанхай» сияқты сауда орындары қатысады. Елде мынадай тауарларға шекті бағалар белгіленді: бірінші сортты бидай ұны, бірінші сортты ұннан жасалған бидай наны (пішінді), рожки (өлшеніп салынатын), қарақұмық жармасы (дән, өлшеніп салынатын), тазартылған күріш (домалақ дәнді, өлшеніп салынатын), сиыр еті (сүйекті жауырын-төс бөлігі), тауық жұмыртқасы (I санатты), күнбағыс майы, ас тұзы («экстра»-дан басқа). Супермаркеттерде, дүкендерде арнайы белгілер орнатылды, сатып алушылар арасындағы арақашықтық 1 метр болуы қажет. Міндетті түрде кезек сақталуы керек. Санитайзерлер орнатылды. Барлық азық - түлік нысаны санитарлық нормаларды қатаң сақтауға міндетті. Тәртіп бұзушылық фактілері анықталған жағдайда айыппұл салынып, нысан жұмысын тоқтатады.