Елордада білім беру саласында тағы бір онлайн жоба іске қосылды

Қалалық білім басқармасы «Education Club Astana» деп аталатын жаңа жобаны қолға алды, деп хабарлайды Елорда Инфо тілшісі әкімдіктің ресми сайтына сілтеме жасап. «Жоба әр жұма сайын сағат 15.00-де Білім басқармасының ресми @bilimastana инстаграм парақшасында тікелей эфирге шығады. «Education Club Astana» жобасының алғашқы қонағы - Назарбаев университетінің түлегі, 100 жаңа есім жобасының 2019 жылғы жеңімпазы, №54 мектеп-лицейінің директоры Сейсенбай Шәкәрім Толыбайұлы», - деп ақпарат таратты білім басқармасы. Алғашқы эфир тақырыбы «Интернетте оқып жүр талай қазақ баласы» деп аталады. Шығарылым барысында қазіргі төтенше жағдай кезіндегі қашықтан оқыту жұмыстарына байланысты сауалдар қойылады. Онлайн-аудитория эфир кезінде өздерін толғандырып жүрген сауалдарды қонаққа жолдай алады.