Елордадағы 5 вирусологиялық зертхана күніне 3,2 мың тексеріс зерттеу жүргізеді – Қисықова

Нұр-Сұлтан қаласы Қоғамдық денсаулық сақтау басқармасының басшысы Сәуле Қисықова әкімдіктің баспасөз орталығында өткен брифингте елордадағы 2 емханада тұрғындарға тексеріс жүргізілетінін айтты, деп хабарлайды Елорда Инфо. «Нұр-Сұлтанда коронавирус инфекциясының таралуы әлі де жалғасып жатыр. Қалада 5 вирусологиялық зертхана жұмыс істеп тұр. Оның қуаты күніне 3 200 тексеріс жүргізуге қауқарлы. 29 443 экспресс-тест сынағы алынды. Сонымен қатар қалада коронавирус инфекциясының одан әрі таралмауының алдын алу мақсатында Алматы мен Байқоңыр аудандарының тұрғындары үшін №6 емханада, ал Есіл және Сарыарқа аудандарының тұрғындары үшін №9 емханада сынама алуға арналған пункттер ашылды. Осы екі емханада бүгінге дейін 4 мыңға жуық адам тексерістен өтті. Оның 1 200-ден астамы жүкті әйелдер. Өкінішке қарай олардың арасында да коронавирус инфекциясы анықталып жатыр. Егер тексерістен өткендерден симптомсыз вирус анықталса, инфекциялық стационарға 3-4 күнге жатқызылады. Ал егер олардан клиникалық симптом анықталмай, патологиялық өзгеріс болмаса, дәрігердің шешімі бойынша эпидемиологтардың келісімімен үй карантиніне шығарылады. Содан кейін оларды дәрігерлер қашықтықтан бақылауға алады», – деді басқарма басшысы.