Елордада карантиндік аумаққа кірмек болған ер адам екі айға қамалды

Ел астанасында 30 жастағы ер адам тәртіп сақшылары күзетіп отырған карантиндік аумаққа кірмек болды, деп хабарлайды Елорда Инфо Polisia.kz-ке сілтеме жасап. Полиция қызметкерлері құжаттарын талап еткенде ер адам өзін агрессиялы түрде ұстауымен қоймай, былапыт сөздер айтып, тәртіп сақшыларының ар-намысы мен қадір-қасиетіне тіл тигізеді. Ал өзін колумбиялық наркобарон Пабло Эскобар деп таныстырады. Аталған факті бойынша ҚР ҚК 378-бабының 1-бөлігі және 379-бабының 1-бөлігі бойынша қылмыстық іс қозғалып, ол уақытша ұстау изоляторына қамалды. 22 сәуірде тергеу сотының санкциясымен 1990 жылы 4 қаңтарда туған азамат Омаров Әмірхан Нұржанұлы екі ай мерзімге қамауға алынды. Айта кетейік, Нұр-Сұлтан қалалық полиция департаменті қазіргі уақытта төтенше жағдай жарияланған жерде билік өкілдеріне тіл тигізу, бағынбау және зорлық-зомбылық жасау фактілері бойынша тараптардың татуласуына байланысты қылмыстық істерді тоқтату тәжірибесі алынып тасталатынын ескертеді.