Астанада 61 мыңнан астам адамға 42,5 мың теңге көлемінде көмек көрсетілді

42,5 мың теңге болатын әлеуметтік көмекті алу үшін 200 мыңнан астам өтінім келіп түсті. Мемлекет басшысының тапсырмасына сәйкес әлеуметтік төлем алушылардың тізімі кеңейтілді. Бұл туралы Нұр-Сұлтан қаласының әкімі Алтай Көлгінов Instagram парақшасында мәлім етті, деп хабарлайды Елорда Инфо. «Өтінімдерді «Азаматтарға арналған үкімет» КЕАҚ-мен және мемлекеттік әлеуметтік сақтандыру қорымен (МӘСҚ) бірлесе қарастырып жатырмыз. Қалалық штаб демалыссыз күшейтілген тәртіпте жұмыс істейді. Өтінішті «Электрондық үкімет» веб-порталы, telegrambot egov.kz немесе 42500.enbek.kz сайты арқылы электрондық форматта беруге болады», - деп жазады қала әкімі Қосымша ақпарат алу үшін жұмыспен қамту және әлеуметтік қорғау басқармасына 55-14-87, 55-01-74, 55-69-59, 55-67-12, 109 (iKomek) хабарласуға болады. «Сондай-ақ, халықты қолдаудың басқа да шараларын іске асырып жатырмыз. 4 АЕК мөлшерінде қосымша әлеуметтік көмекті 41 мың отбасы алады. Олар – I,II, III топтағы мүгедектігі бар азаматтар, ерекше қажеттілігі бар балалар, ерекше қажеттілігі бар баланың күтімімен айналысатын ата-аналар, АӘК алушылар», - дейді Алтай Көлгінов. Елбасының тапсырмасына сәйкес халықтың әлеуметтік әлсіз топтарына «Birgemiz» ҚҚ картаға 50 000 теңге аудара бастады. Сонымен қатар, «Nur Otan» партиясымен бірлесе отырып, «Birgemiz» акциясы аясында 6 мың әлеуметтік аз қамтылған отбасыға азық-түлік себеті берілді. Наурыз айында азық-түлік себеті түріндегі кепілді әлеуметтік пакетті 2700 отбасыдан астам алды, 4,5 мың бала қамтылды. Мемлекеттік әлеуметтік көмек сәуір айында да беріледі. Жыл басынан бері атаулы әлеуметтік көмек 3 мың 400 отбасыға тағайындалды.