Алакөлге әуе рейстері ашылады

Алакөл демалыс аймағындағы Үржар кентіне Нұр-Сұлтан, Алматы мен Өскеменнен рейстер ашылады, деп хабарлайды Елорда Инфо тілшісі Индустрия және инфрақұрылымдық даму министрлігіне сілтеме жасап. ИИДМ биыл төтенше жағдай аяқталғаннан кейін Алакөл демалыс аймағына барып-қайтуға қолайлы болу үшін Үржар кентіне субсидияланған әлеуметтік маңызы бар рейстер ашуды жоспарлап отыр. Атап айтқанда: Нұр-Сұлтан қаласынан Үржарға «Южное небо» әуе компаниясы мамырдан қазан айына дейін аптасына 6 және одан көп рейс орындайды. Оған 174,3 млн теңге бөлінеді. Бір жаққа тариф құны - 16 мың теңге. Алматыдан Үржарға «Южное небо» әуе компаниясы мамырдан қазан айына дейін 4 және одан көп рейс орындайды. Оған 109,4 млн теңге бөлінеді. Бір жаққа тариф құны - 14 мың теңге. Өскеменнен Үржарға «Южное небо» әуе компаниясы жыл бойына аптасына 1 рейстен атқарады. Бөлінетін сома – 207,7 млн теңге. Тариф құны – 10 мың теңге. 2020-2025 жылдарға арналған «Нұрлы жол» инфрақұрылымды дамыту бағдарламасына сәйкес, биыл Үржар кентіндегі әуежайдың ұшу-қону жолағы мен әуежай ғимаратын қайта жаңғырту жұмыстарын бастау жоспарланған. Қазіргі уақытта Шығыс Қазақстан облысының әкімдігі жобалық-бағалау құжаттамасын реттеп жатыр. Бұған қоса, Алакөлге бару үшін Нұр-Сұлтан, Алматы мен Талдоқорғаннан Үшаралға ұшып баруға болады. Министрлік елдегі төтенше жағдай аяқталғаннан кейін Алакөл көлінің жағалауына барып-қайтуға қолайлы болу үшін Үшарал қаласына да субсидияланған әлеуметтік-маңызы бар рейстер орындауды жоспарлап отыр. Атап айтқанда: Нұр-Сұлтаннан Үшаралға «Qazaq Air» әуе компаниясы мамырдан қазанға дейін аптасына 4 және одан көп рейс орындайды. Оған 265 млн теңге бөлінеді. Тариф құны – 16 мың теңге. Алматыдан Үшаралға «Южное небо» әуе компаниясы мамырдан қазанға дейін аптасына 6 және одан көп рейс орындайды. Бөлінген сома – 225,8 млн теңге. Тариф құны – 10 мың теңге. Талдықорғаннан Үшаралға «Жетісу» әуе компаниясы мамырдан қазанға дейін аптасына 4 және одан көп рейс орындайды. Оған 218,7 млн теңге бөлініп, тариф құны 8 мың теңге болады. 2020-2025 жылдарға арналған «Нұрлы жол» инфрақұрылымды дамыту бағдарламасына сәйкес, биыл республикалық бюджеттік комиссия мақұлдаған жағдайда Үшарал кенті әуежайының ұшу-қону жолағы, басқару жолы, тұрақтар мен перронды қайта жаңғырту жоспарланып отыр. Жобалық-бағалау құжаттамасы пысықталып, «Мемлекеттік сараптама» РМК-нің оң қорытындысы алынған. Соған сәйкес жобаның толық құны 7,5 млрд теңгені құрайды (2020 ж - 4,7 млрд теңге, 2021 ж – 2,7 млрд теңге).