Жыл сайын обырдан 13 мың адам қайтыс болады – министр

Жыл сайын елде обырдан 13 мыңнан астам адам қайтыс болады. Өлім құрылымында бірінші орында өкпе обыры (16,3%), екінші орында – асқазан обыры (12%), үшінші орында – тоқ ішек обыры -10,6%). Бұл туралы бүгін Үкімет отырысында Денсаулық сақтау министрі Ажар Ғиният айтты, деп хабарлады Elorda.info.

Жекелеген өңірлерде емдеу жүргізу үшін жағдайлар әртүрлі екенін көріп отырсыздар. Мәселен, Қызылорда облысында онкология орталығы тозған ғимаратта орналасқан, палаталар көп орынды. Павлодар және Маңғыстау онкология орталықтарындағы заманауи креслолары, функционалдық төсектері бар жеке палатарды мысал ретінде алуға болады, - деді Ажар Ғиният.

Министрдің айтуынша, еліміздің барлық өңірлерінде сәулелік терапия жүргізу үшін желілік үдеткіштер, ал бірқатар ірі облыс орталықтарында аппараттар орнатылады. Сәулелік емдеуді кеңейту және жетілдіру көзделген (протондық терапия, интраоперациялық сәулелік терапия).

Лапароскопиялық хирургияны дамыту, 3-D моделдеу және басып шығару арқылы реконструктивтік-пластикалық операциялардың спектрін кеңейту үшін тиісті жабдықтармен жабдықтау көзделген. Ісікке қарсы жаңа дәрілік заттарға қолжетімділікті арттыру мақсатында таргеттік және иммундық-онкологиялық препараттар желісін кеңейту (10 таргеттік, 2 иммундық-онкологиялық препаратқа қолжетімділік жоқ), гендік инженерияны, радиофармацевтикалық препараттарды пайдалана отырып терапияны енгізу бойынша жұмыс жүргізілетін болады, - деді министр.

Министр медициналық жабдықтарды, дәрілік препараттарды сатып алуға, мамандарды оқытуға, заманауи онкология орталықтарын салуға, реконструкциялауға және күрделі жөндеу жүргізуге  шамамен 474 млрд теңге қажет екенін айтты.

2022 жылғы 18 қазанда өткен Дүниежүзілік денсаулық сақтау саммитінің мәліметтері бойынша «Онкологиялық аурулардың басым бөлігінің алдын алуға болады. Обыр үкім емес – тоқтамай күресу қажет.» делінген. Қазақстанда обырды ерте диагностикалау мен емдеу әдістерін жетілдіру үшін біз барлық күш-жігерімізді жұмсауымыз қажет.