Іздеу Табысым екі есеге артты: Астана тұрғыны JOLTAP жобасы туралы пікір білдірді
Нұрдәулет Кәкіш
Елорда тұрғыны JOLTAP жобасының курсын оқығаннан кейін табысы екі есеге артқанын айтты, деп хабарлады Elordainfo.kz.
JOLTAP жобасының түлегі Гүлзира Ахметованың алғашқы мамандығы заңгер, заң ғылымдарының магистрі, резервтегі судья. Кейін ағылшын тілінен аудармашы мамандығы бойынша білім алған ол бала күтімі демалысы кезінде SMM мен таргеттің ақылы курстарынан өткенімен, клиент кейде болса, кейде болмағанын айтады.
«JOLTAP жобасы туралы уатсаптағы топтың бірінен әйел адамның тегін курстар жайлы жазғанын көзім шалып қалды. Содан ол кісіге хабарласып, мән-жайды сұраған соң JOLTAP модульдік пунктіне барып, таргетолог курсына жазылдым. Сол кезде декреттік демалыста болғанмын. SMM, таргеттің ақылы курстарынан өткен едім. Бірақ клиент кейде болса, кейде болмайтын. Кейін JOLTAP жобасындағы таргет курсынан өткен соң агенттікке жұмысқа орналастым. 2025 жылы таргет бойынша сол агенттікте 6 айдай жұмыс істедім. Қазір енді өз-өзіме жұмыс істеп жатырмын. JOLTAP курсынан кейін табысым екі есеге артты. Қазіргі таңда екі жобамен жұмыс істеп жүрмін. Алда шетелде тұратын клиенттерге шықсам деген жоспарым бар», – деді Гүлзира Мұхамедқалиқызы.
Айта кетейік, JOLTAP жобасы Астана қаласы әкімдігінің бастамасымен және «Жаңа мүмкіндік» қоғамдық қорының қолдауымен жүзеге асырылып жатыр. Оның аясындағы қысқамерзімді оқыту бағдарламасы 18-50 жас аралығындағы Астана тұрғындары үшін тегін ұсынылады. Оқудан кейін қатысушыларға сертификат беріледі. Ал түлектердің кандидатуралары JUMYSTAP.KZ атты жұмыс және қызметкерлерді іздеуге арналған сайтта тегін жарнамаланады.
Бұған дейін JOLTAP жобасының түлегі Нұргүл Жұмабекқызының жоба аясында өзіне ыңғайлы кестемен жұмыс тапқанын айтқанын жазған едік.
