СҚО-да 380 млн теңгенің орындалмаған жұмысы бойынша іс тергеліп жатыр

Фото: ҚМА

СҚО Айыртау ауданындағы құрылыс кезінде бюджет қаражатын жымқыру дерегі бойынша тергеп-тексеру жұмыстары басталды, деп хабарлайды Elordainfo.kz Қаржылық мониторинг агенттігіне сілтеме жасап.

Ақпаратқа сәйкес, 2017 жылы Энергетика және тұрғын үй-коммуналдық шаруашылық басқармасы «Бизнестің жол картасы — 2020» бағдарламасы аясында «Akcent KZ» ЖШС-мен «Сырымбет» кен орнына дейін ішкі алаңдағы жол тармақтары мен инженерлік желілері бар теміржол кірме жолын салу жөнінде шарт жасасқан.

«Сырымбет» кен орнының өңір үшін стратегиялық маңызы бар. Ол — Қазақстандағы жалғыз әрі Орталық Азиядағы ең ірі қалайы кен орны. Мемлекеттік сатып алудың жалпы құны 1,4 млрд теңгені құрады. Бастапқыда құрылыс 2018 жылы аяқталады деп жоспарланған, алайда жобаны іске асыру мерзімі бірнеше рет ұзартылған. Соған қарамастан, нысан құрылысы әлі күнге дейін аяқталмаған. Нәтижесінде іс жүзінде орындалмаған жұмыстардың құны 380 млн теңгені құрады», - делінген хабарламада.

Іс бойынша мердігер ұйымның басшысы және Энергетика және тұрғын үй-коммуналдық шаруашылық басқармасының бұрынғы басшысы күдікті деп танылды.

Сот санкциясымен 3 пәтер мен автотұрақ орнына тыйым салынды. Тергеп-тексеру жалғасып жатыр.

Өзге ақпарат ҚР ҚПК-нің 201-бабына сәйкес жария етілмеді.

Еске салсақ, 21 млрд теңге жинаған «Amanat Drive» қаржы пирамидасының басшылары сотталды.