Елордада пошта қызметкерлері жаңа конституциялық реформаға қолдау көрсетті

Фото: Жалпыұлттық коалиция Астана қалалық филиалы

Астанадағы «Қазпошта» АҚ ұжымымен жаңа Конституция нормаларын түсіндіру және алдағы референдум аясында кездесу өтті, деп хабарлайды Elordainfo.kz.

Ашық форматта еңбек ұжымына жобаның негізгі баптары мен алдағы конституциялық өзгерістердің басты бағыттары таныстырылды.

«Қазпошта» АҚ – Қазақстан Республикасының ұлттық пошта байланысы операторы, толық көлемде пошта, логистика және қаржылық қызметтерді көрсететін компания. Ұйым еліміз бойынша корреспонденция мен пакеттерді жеткізуді қамтамасыз етеді, сондай-ақ аударымдар мен төлемдер сияқты қаржылық қызметтерді жүзеге асырады, бұл оның азаматтардың күнделікті өмірі мен экономиканың маңызды бөлігі екендігін көрсетеді.

Кездесу барысында ҚР Парламенті Сенатының депутаты Жанна Асанова, Астана қалалық мәслихатының депутаты Азамат Орынбасаров және блогер Әсем Нұрсейіт сөз сөйледі.

Жанна Асанова өз сөзінде:

«Бұл реформа қоғамдағы ашықтық пен жауапкершілікті арттыруға, азаматтардың шешім қабылдауға қатысуын кеңейтуге бағытталған. Әрбір адам өз пікірін білдіре отырып, елдің дамуына нақты үлес қосады», - деді.

«Референдум – бұл әр азамат үшін өз көзқарасын білдіру мүмкіндігі. Сіздердің ұжымдарыңызбен кездесе отырып реформалардың күнделікті өмірге қалай әсер ететінін түсіндіргіміз келді», - деді Азамат Орынбасаров.

Еске салсақ, Астанада жаңа Конституция жобасын қолдауға арналған іс-шара өтті.