Іздеу 
Ернұр Сағымбек
Елордадағы Әл-Фараби атындағы Оқушылар сарайында «Қазіргі әлемдегі рухани-адамгершілік құндылықтар негізінде экологиялық ағарту» атты халықаралық экологиялық конференция өтіп жатыр. Екі күнге жоспарланған форумға 400-ден астам адам – жетекші сарапшылар, ғалымдар, халықаралық дипломаттар мен экологиялық қозғалыстардың белсенді жастары қатысып жатыр, деп хабарлайды Elordainfo.kz Астана әкімдігінің ресми сайтына сілтеме жасап.
Конференцияда қатысушылар бірнеше негізгі баяндама тыңдады. Қазақстандық және шетелдік ғалымдар Жердің саулығы мен медицина, соның ішінде гастроэнтерология арасындағы байланысты талқылады. Сондай-ақ экологияны қоршаған орта мен адам денсаулығының бір-біріне әсері тұрғысынан түсіндірді.
Халықаралық сарапшылар Орталық Азиядағы су тапшылығы мен климаттың өзгеруіне, сондай-ақ құрғақ өңірлердегі су ресурстарын тиімді басқару мәселелеріне тоқталды. Қоғам қайраткерлері қоршаған ортаның жағдайын азаматтардың бақылауы, қоғамдық пікірдің маңызы және «Таза ғаламшар» жобасы аясында экологиялық мәдениетті қалыптастыру тәжірибесімен бөлісті.
Форумның негізгі ойларын оның модераторлары – «Жер елшілері» экологиялық жастар қозғалысының жетекшілері қорытындылады.
«Экологиялық ағарту құрғақ теория немесе қағаз жүзіндегі ережелер жиынтығы болып қалмауы керек. Табиғатты қорғау мемлекеттік міндет қана емес, әр адамның бойындағы табиғи адамгершілік ұстанымға айналуы қажет. Біз жас ұрпақтың өмірлік көзқарастары өзгеріп жатқанын көріп отырмыз. Біздің міндетіміз – олардың табиғатқа деген саналы көзқарасын нақты істерге айналдырып, Қазақстанның түкпір-түкпірінде жүйелі экологиялық бастамаларды іске асыру», – деді «Жер елшілері» экологиялық жастар қозғалысының жетекшісі Нұрдәулет Мұхтарбек.
«Жер елшілері» экологиялық жастар қозғалысының директоры Темірлан Макубаев конференцияға қатысушылардың ортақ мақсат жолында біріккенін атап өтті.
«Рухани-адамгершілік тәрбие туралы айтумен шектелмей, оны жүзеге асырудың нақты жолдарына көшуге дайынбыз. Бұл жұмыс қоғамдық экологиялық бақылаудан бастап, күнделікті өмірде ресурстарды үнемдеп пайдалануға дейінгі бағыттарды қамтиды. Мұндай ашық пікір алмасу жаңа бірлескен жобалардың басталуына жол ашады деп сенемін», – деді ол.
«Қазіргі әлемдегі рухани-адамгершілік құндылықтар негізінде экологиялық ағарту» конференциясы Қазақстан мен өңір елдерінде табиғатқа деген көзқарасты жаңғыртуға ықпал етуді мақсат етеді. Қатысушылар рухани құндылықтарды білім беру жүйесі мен экологиялық бағдарламаларға енгізу үйлесімді болашақ құрып, ғаламшардың тұрақты дамуына үлес қосатыны туралы ортақ пікірге келді.
