Президенттің баспасөз хатшысы қызметінен кетті

Жақында ғана Президенттің баспасөз хатшысы болып тағайындалған Нұрмұхамед Байғараев қызметінен кетті, деп хабарлады Elorda.info 

Бұл туралы ол өзінің Facebook парақшасында жазды. Ол жұмыстан кету себебін аяқ асты денсаулығының нашарлап кетуімен түсіндірді.  

 Құрметті достар! Кеше денсаулығыма қатысты оқыс жағдайдан соң (приступтар) дәрігерлерге тексерілуге мәжбүр болдым. Толық тексерістен кейін сырқаттың белгісі байқалды. Дәрігерлер ұзақмерзімді ем-домды бірден бастауды, оны тұрақты қабылдауды және бастысы – ұшақпен ұшуды белгілі бір уақытқа дейін тоқтатуды талап етті.   

Медициналық талап қазіргі қызметімді толыққанды атқаруға кедергісін келтіретіні белгілі. Себебі аймақтарға және шетелдерге іс-сапарлар тұрақты түрде болады. Бұл – жиі ұшақпен ұшу деген сөз. 

Шыны керек, мұндайды өзім де күтпедім. Жоспар басқаша еді. Өткен аптада кіріскен қызметіме біліміммен, біліктілігіммен дайын едім. Баспасөз қызметін жетілдіруге, одан әрі ашық етуге қатысты бірнеше идея, бастамаларым бар еді. 

Алайда «денсаулық – бірінші байлық» деп бекер айтпаған. Сондықтан қандай қызмет болса да, ең алдымен, уақыт өткізбей, толық емделіп алу қажет деп таптым. Осыған орай, Президент баспасөз хатшысы қызметін қазір тоқтата тұруыма тура келеді.  Басшылық жағдайды түсінді. Түсіністік танытқан барша азаматқа алғыс айтамын, - деп жазды ол.

Еске сала кетейік, ол 6 қыркүйек күні Мемлекет басшысының жарлығымен ҚР Президентінің баспасөз хатшысы болып тағайындалған болатын.