Ұлттық ұланның 450 сарбазы салтанатты түрде әскери ант қабылдады

12 шілде, 2025
Ернұр Қайнар Ернұр Қайнар
Ұлттық ұланның 450 сарбазы салтанатты түрде әскери ант қабылдады
Фото: Ұлттық ұлан баспасөз қызметінен

Қарағанды қаласында орналасқан ҚР ІІМ Ұлттық ұланының «Орталық» өңірлік қолбасшылығына қарасты 6505 әскери бөлімінде әскери ант қабылдау салтанатты рәсімі өтті. Іс-шараға еліміздің барлық өңірлерінен келген 450-ге жуық жас сарбаз қатысты, деп хабарлады Elordainfo.kz.   

Бұл сәт олардың әскери өмірдегі алғашқы қадамы және Отан алдындағы қасиетті борыштарын атқарудың бастауы болды.

Әскери ант – әр жауынгер үшін үлкен жауапкершілік пен адалдықтың символы. Салтанатты іс-шарада сарбаздар Қазақстан Республикасы мен оның халқына жанқиярлықпен қызмет етуге дайын екендіктерін ресми түрде мәлімдеді.

Айтулы рәсімге сарбаздардың ата-аналары, туыстары мен жақын достары шақырылды.  

Әскери бөлімнің командирі, полковник Мақсат Қырғызбаев пен шақырылған қонақтар әскердегі қызмет – құрметті және маңызды міндет екенін атап өтіп, сарбаздарға жылы лебіздерін білдірді.

– Әскери ант қабылдау сәті әр сарбаздың жүрегінде мәңгі қалады. Отан қорғаушы болу – батылдықты, табандылық пен адалдықты талап ететін асыл миссия, – деді полковник Мақсат Қырғызбаев.

Айта кету керек, қатарға жаңадан қосылған жас Отан қорғаушылар енді түзеу мекемелеріндегі қауіпсіздікті күшейтуге қатысатын болады.

Іс-шара соңында бөлім командирі ата-аналарымен жүздесіп, сұрақтарына жауап берді. Ант қабылдаған сарбаздар жақындарымен уақыт өткізуге босатылды.