Елордада Үндістанның Қазақстандағы елшісі тілшілермен кездесті

Кездесу барысында елші Доктор Т.В. Нагендра Прасад Қазақстан мен Үндістан қай салалар бойынша тәжірибе алмасатынын айтты, деп хабарлады Elorda.info.

Үндістан мен Қазақстан 2000 жылдан астам уақытқа созылған ежелгі тарихи қатынастармен байланысты. Қос тарап тауарлармен, идеялармен және мәдени тұрғыда тұрақты алмасып келеді. Үндістан Қазақстанның тәуелсіздігін мойындаған алғашқы елдердің бірі болды. Дипломатиялық қатынастар 1992 жылы 22 ақпанда құрылды. Содан бері жоғары деңгейдегі сапарлар екі ел  қарым-қатынасына  жаңа серпін берді, - деді  елші.

Қазақстан – Үндістанның Орталық Азиядағы ең ірі сауда және инвестициялық серіктесі.

Біздің екі жақты тауар айналымымыз үш жыл қатарынан 2 миллиард доллардан асады. Бізде сауданы кеңейтуге үлкен мүмкіндік бар. Перспективалы секторлар - пайдалы қазбаларды өндіру, фармацевтика, жаңартылатын энергия көздері, технологиялар, өндіріс және т.б. Оларға ерекше назар аудару қажет. Өйткені Үндістанның кең ресурстары мен тәжірибесі бар, - деді Доктор Т.В. Нагендра Прасад.

Астанадағы Свами Вивекананда мәдени орталығы әртүрлі мәдени іс-шараларды өткізіп тұрады. Олардың қатарында йога, би және музыка сабақтары бар. Биыл Халықаралық йога күні бүкіл Қазақстан бойынша 21 қалада аталып өтті. 

Қазіргі уақытта Қазақстанда 9500-ден астам үнді студенттері медицина саласы бойынша білім алып жатыр. Ал қазақстандық студенттер  «Үндістандағы оқу»  бағдарламасы бойынша инженерлік және ақпараттық технологияларды оқу бойынша оқи алады. 

Туризм бойынша Үндістан жылдың кез келген уақытында  тарих, мәдениет, таулар мен теңіздер, сауықтырудан бастап медициналық сауықтыруға дейінгі қызметтер ұсынады.

Гоа және Тәж-Махал сияқты орындар қазақтар арасында өте танымал. Үндістан сапасы мен қол жетімділігіне байланысты медициналық және сауықтыру туризмі үшін өте танымал бағыт болып саналады. Нью-Дели мен Алматы арасында аптасына 11 рейс қатынайды. Бұл екі ел арасындағы туризмнің дамуына серпін берді. Біздің электронды визаны үйден шықпай-ақ алу оңай және ол Қазақстанға ұзартылды, - деді спикер.