«Астаналық» деген жоғары атаққа нұқсан келтірмеуіміз керек – Сәдібек Түгел

Әлем елдері үшін Астана Азия мен Еуропаны байланыстыратын тарихи орталық болып есептеледі. Ел астанасының бой көтеруіне, іргетасы берік қалануына қазақстандықтар  жұмыла атсалысты. Осыдан 27 жыл бұрын 10 желтоқсанда Ақмола қаласы еліміздің астанасы болып жарияланды. Осыған орай Астана қаласы әкімдігінің тұңғыш баспасөз хатшысы, ҚР Еңбек сіңірген қайраткері Сәдібек Түгел пікір білдірді, деп хабарлады Elordainfo.kz.

«Жиырмасыншы және жиырма бірінші ғасыр тоғысында туған еліміздің абыройын асқақтатқан, ұлт өмірінде өте сирек кездесетін тарихи оқиға орын алды. Қазақтың жазира даласы Сарыарқаның нақ төсінде теңдесі жоқ, таңғажайып жаңа шаһар – Астана қаласы салынды.  Бүгін Астананы бүкіл әлем танып, мойындады. Елорда дүниежүзіндегі ең сәулетті қалалардың біріне, қазақстандықтардың мақтанышына айналды. Ол ең алдымен   дана  халқымыздың ерлігі әрі көрегендігі», - деді спикер.

Оның айтуынша, 27  жылдың ішінде Астана беделі мен қуаты асқан, әлемге өз үлесін қосқан жасампаз қала болды.

«Астаналық болу үлкен жауапкершілікті талап етеді. Өйткені шетелдіктер Астанаға қарап елімізді таниды. Бас қаланың гүлденуі – Қазақстанның гүлденуі.   Астана   қаласының   әкімі Жеңіс   Махмұдұлы  бастаған ұжым ауқымды шараларды жүзеге асырып, қаланы таза ұстап, жарқыратып, жайнатып келеді. Оған біздер – куәміз, Астананың өркендеуіне ерекше үлес қосып келе жатқан азаматтарға зор алғыс білдіреміз. Осы орайда айтарымыз, қаланың таза, көркем, әсем болуы әрбір тұрғынға тікелей байланысты. Заманында халқымыздың ғұлама перзенті Әл-Фараби былай деген: «Адам сияқты шаһардың да тамырын жалғаған қаны, бойына біткен жаны болады. Тек оның тәнін тірі қылатын да, шаруасын ірі қылатын да – шаһар халқы», - деді ҚР Еңбек сіңірген қайраткері. 

Сондай-ақ ол көпшілікті экоакцияларға белсенді түрде қатысуға шақырды.

«Күн сайын көркейіп, өркендеп келе жатқан Астананың дамуына үлесімізді  қосайық. Ең алдымен, қала басшылығының қарқынды жұмысына қолдау көрсетіп, Астананың тазалығына бәріміз атсалысуымыз керек деп санаймын, «астаналық» деген жоғары атаққа нұқсан келтірмеуіміз қажет. Қала  басшылығының  бастауымен өткізіліп  жатқан «сенбіліктер»  мен   шаһарды  кір-қоқыстан  тазартуға   арналған   акцияларға  белсене   қатысуға   шақырамыз.  Аталарымыз  «жұмыла  көтерген  жүк  жеңіл»  деп  бекер айтпаған. Бәріміз  бір  кісідей   жұмылып,  өз   үйіміздің,  жұмыс  орнымыздың айналасын   және   аулаларды   қоқыстардан  тазартсақ   өте  дұрыс  болар  еді.  Сонымен қатар астаналықтар қалада  өткізіліп жатқан мәдени іс-шараларға тікелей қатысып, оның жоғары деңгейде ұйымдастырылуына себепкер боларына сенім білдіреміз. Сүйікті қаламыз Астананың өркендеуіне үлес қосайық. Себебі Астананың абыройы – мемлекетіміздің абыройы!», - деді ол.

Сөз соңында спикер қазақстандықтарға жылы лебізін білдірді.

«Алда  келе  жатқан Астананың  туған   күні -  10  желтоқсан  күні құтты болсын! Құт-береке мол болсын!  Береке-бірлігіміз арта берсін!  Астана  қаласы қарыштап  дами  берсін!», - деп сөзін түйіндеді Сәдібек Түгел.