Жүк көліктерінің жылдамдығына шектеу қойылуы мүмкін

Ішкі істер министрлігі ауыл, қала ішінде жүк көліктерінің рұқсат етілген жылдамдығын сағатына 60 шақырымнан 50-ге дейін азайтуды жоспарлап отыр, деп хабарлады Elorda.Info.

Министрліктің түсіндіруінше, жүк көліктерінің қатысуымен болған жол-көлік апаттарының зардабы бірнеше есе ауыр. Сондықтан мұндай жол апаттарының санын азайту мақсатында осындай норма енгізілмек. 

Жол көліктері сағатына 50 километр жылдамдықпен жүрген жағдайда өлім мен жарақат көрсеткіштері айтарлықтай төмендейді. Дүниежүзілік денсаулық сақтау ұйымының статистикасы бойынша, жылдамдық режимін сағатына 50 километрге дейін төмендету жол-көлік оқиғасы кезінде өлім ықтималдығын 25 пайызға төмендетеді, аман қалу мүмкіндігін арттырады, – делінген Ішкі істер министрлігінің түсіндірме жазбасында.

Еске салайық, өткен жылы автобустардың қозғалысы да дәл осылай, сағатына 60 шақырымнан 50-ге дейін шектелген болатын.