Елімізде балалар министрге тікелей хат жолдай алады

​27 мамыр мен 1 маусым аралығында «Қазақстан балалары» онкүндігі аясында республикалық «Министрге хат» акциясы өтеді, деп хабарлады Elordainfo.kz. 

​Акцияның мақсаты – балалардың өз ойларын ашық айтып, мектеп, қала немесе ел тұрмысына қатысты ұсыныс білдіруіне, сұрақ қоюына мүмкіндік беретін ашық диалог алаңын құру.

Хаттар келесі электрондық пошта арқылы қабылданады: balalaruni2025@gmail.com.

Өтініш білдіру форматы еркін: бұл мәтін, сурет, фотосурет немесе қолмен жазылған хаттың скан-нұсқасы, бейнежазба немесе презентация болуы мүмкін.

​Хатта міндетті түрде көрсетілуі тиіс:

• баланың тегі мен аты;

• оқу орны;

• мекенжайы мен байланыс телефоны.

​Акция қорытындысы бойынша министр хаттармен жеке танысып, ең мазмұнды әрі шынайы хаттарға жеке жауап береді.

​«Министрге хат» – бұл әр баланың дауысы маңызды саналатын сенім мен құрмет алаңы.