Бір күнде 100-ден астам азамат өз автокөліктерін заңдастырды

23 қаңтарда елде шетелдік автокөліктерді заңдастыру науқаны басталды. Сағат 18:00-дегі ақпаратқа сәйкес алдын ала мәлімет бойынша 2 мыңнан астам өтінім мақұлданды, оның ішінде 100 адам тиісті құжаттарын алды, деп хабарлады Elorda.info ІІМ баспасөз қызметіне сілтеме жасап.

Құжаттары толық азаматтар мемлекеттік нөмірлік белгілерін алып, өз көліктерін сәтті заңдастыруда, – делінген хабарламада.

Азаматтарға ХҚКО-ларда мамандар көмектесуде. Онда кеңес алып, базалар бойынша құжаттарды тексеруге мүмкіндік бар. Әрбір өтінім жеке қаралады. Қосымша сұрақтар туындаған автокөлік иелеріне қажетті ұсыныстар беріледі.

Халыққа қызмет көрсету орталықтары сағат 22:00-ге дейін жұмыс істейді.

Естеріңізге сала кетейік, заңдастыруға өтінімді е-gov.kz электрондық үкімет порталы, екінші деңгейлі банктердің қосымшалары, Халыққа қызмет көрсету орталықтары арқылы беруге болады.

Оқи отырыңыз: Елімізде шетелдік көлікті заңдастыруға арналған сервис іске қосылды

Ереже бойынша автокөлік Қазақстанға 2022 жылдың 1 қыркүйегіне дейін әкелінген болуы керек, қылмыстық есепте болмауы тиіс, басқа мемлекетте бұрынғы тіркелген жері бойынша есептен шығарылуы қажет. Сондай-ақ Еуразиялық экономикалық одаққа кірмейтін елдерден әкелінген автокөлік кедендік тазартудан өтуі тиіс.

Егер автокөлік заңдастыруға жататын болса, онда алғашқы тіркеу үшін мемлекеттік алымды, мемлекеттік нөмірге төлем мен техпаспорт үшін мемлекеттік БАЖ төлеу қажет.

Заңдастыру 2023 жылдың 1 шілдесіне дейін жалғасады.