Елімізде жемістер мен көкөністер бір жылда 17 пайызға қымбаттады

 Биылғы қараша айының қорытындысы бойынша азық-түлік тауарлары бір айда 1,8%-ға, бір жылда 24,1%-ға қымбаттады, деп хабарлады Elorda.info.

Ай сайынғы динамика бойынша азық-түлік тауарлары бағасының ең көп айлық өсімі Ұлытау облысында байқалды: 2,4%. Одан кейін елорда мен Жамбыл облысында да айтарлықтай өсті.

Жылдық динамика бойынша сектордағы бағаның ең көп өсуі Маңғыстау облысында тіркелді: бірден 31,4%. Ақтөбе облысы мен Шымкент екінші және үшінші орында: әр өңірде 25,8%. Ең аз жылдық өсім Шығыс Қазақстан облысында тіркелді: «бар болғаны» 22,6%.

Оның ішінде жаңа піскен жемістердің құны бір жылда 18,9%-ға, көкөністер 11%-ға өсті. Жемістер ішінде банан бірден 45,8%-ға апельсин — 26,2%-ға, алма — 11,3% -ға, лимон — 8,6% -ға, кептірілген өрік — 65,4%-ға қымбаттады.

Қараша айында сүт өнімдерінің бағасы бір жыл ішінде 30%-ға өсті. Ет, оның ішінде ет өнімдері бір жылда 16,1% -ға қымбаттады. Бірінші санаттағы жұмыртқаның он данасы орташа есеппен 468 теңге тұрады, бұл бір жыл бұрынғыдан 20%-ға қымбат.

Бір жылда нан 19,3%-ға, жарма 36,8%-ға, макарон өнімдері 42,2%-ға, ұн 43,7%-ға қымбаттады.