Ақмола облысында көлігінде «Z» белгісі бар жүргізуші жазаға тартылды (ВИДЕО)

Ақмола облысында көлігінде «Z» белгісі бар жүргізуші жазаланды, деп хабарлады Elorda.info ІІМ баспасөз қызметіне сілтеме жасап.  

7 қазан күні сағат 18.15-те жергілікті тұрғыннан Атбасар қаласындағы балалар ойын-сауық орталықтарының бірінің маңында есігінде «Z» әрпі бар көлік тұрғаны туралы ақпарат тәртіп сақшыларына келіп түсті. Атбасар аудандық ішкі істер бөлімінің қызметкерлері «УАЗ 469» автокөлігінің иесін анықтап, жүргізушіге қатысты ҚР ӘҚБтК-нің 590-бабының 10-бөлігі (Көлiк құралдарын пайдалану қағидаларын бұзу) бойынша әкімшілік хаттама толтырылды. Тәртіп бұзушыға 20 АЕК көлемінде айыппұл салынады, - делінген хабарламада.

Атбасар қаласының 60 жастағы тұрғынымен профилактикалық әңгіме жүргізілді.

Көліктегі жапсырма алынып тасталды. Айта кетерлігі, аталған азама осымен екінші рет осыған ұқсас заң бұзып отыр. Бұған дейін ер адам ҚР ӘҚБтК-нің 590-бабының 5-бөлігі бойынша жауапқа тартылған болатын. Сонымен қатар ер адамға қатысты ҚР ӘҚБтК-нің 434-бабы (ұсақ бұзақылық) бойынша хаттама толтырылды, - делінген хабарламада.

Айта кетейік, бұл белгі Ресейдің Украинадағы агрессиясы ретінде танымал болған. Ресейлік әскери техника «Z» және «V» белгілерімен таңбаланған.