Қазақстанда ірі газ жеткізушілерге қатысты тергеу аяқталды

Сұйытылған мұнай газының алты ірі көтерме жеткізушісіне қатысты тергеу аяқталды. Сұйытылған мұнай газын сатушылар жағдайды пайдаланып, ең жоғары баға белгіленгені анықталды, - делінген хабарламада.

«Қазақойл Ақтөбе» ЖШС-не қатысты әкімшілік айыппұл салу туралы сот шешімі шығарылды. «СНПС-Ақтөбемұнайгаз» АҚ және «СП Қазгермұнай» ЖШС-не қарсы әкімшілік істер қозғалып, сотқа берілген.

Ал Petrosun ЖШС және «Қазақ газ өңдеу зауыты» ЖШС қатысты қылмыстық істер қозғалып, «ҚазМұнайГаз» ҰК» АҚ бойынша іс материалдары қаржы мониторингі агенттігіне берілген.

Сондай-ақ, «Қазақ газ өңдеу зауыты» ЖШС-нің әрекеттерінде сұйытылған мұнай газын өткізу көлемін заңсыз қысқарту деректері анықталған.

Баспасөз қызметі мәліметінше, бәсекелестікті қорғау және дамыту агенттігі сұйытылған мұнай газын бөлшек саудада өткізушілерге қатысты 193 тергеу жүргізіп жатыр, оның 89-ы Бас прокуратурамен бірлесіп жүргізіледі.

Нарықтың 65 субъектісінің іс-әрекетінде келісілген іс-қимылдар мен картельдік сөз байласу деректері анықталды. 45 субъектіге қатысты әкімшілік іс қозғалды, материалдар сотқа жолданды. Әкімшілік айыппұлдың жалпы сомасы 92 миллион теңге болады, - делінген хабарламада.

Айта кетейік, қаңтар айында Қазақстанда сұйытылған газдың қымбаттауына жаппай наразылық өткен еді. Наразылықтар Жаңаөзен мен Ақтауда басталды, содан кейін басқа қалаларда, соның ішінде Алматыда да жалғасты.

5 қаңтарда Мемлекет басшысы Бас прокуратураға бәсекелестікті қорғау агенттігімен бірлесіп сұйытылған мұнай газын сатумен айналысатын компанияларға қатысты тергеу жүргізуді тапсырды.