Апаттан көз ашпаған кеншілер «АрселорМиттал Теміртауға» талап қойды

«Абай шахтасындағы апат кеншілердің проблемасын тағы да ашып берді. Ең бастысы, қауіпсіз еңбек жағдайымен қамтамасыз ету, компания кеншілердің жұмыстан кейін аман-есен үйлеріне оралуына кепілдік берсін. Біздің кәсіпорындарда жұмыс күші жетіспейді. Сөйте тұра қондырғылар әбден тозған. Осындай жағдайда көмір қазып өмірін қауіпке тігетін адамдардың жалақысын да көтеру керек», - деді «Қорғау» көміршілер кәсіподағының төрағасы Евгений Буслаев.

Еске сала кетсек, бұған дейін «Абай» шахтасындағы апаттан 6 адам қаза тапқан болатын. Ал 2 кенші әлі ауыр халде жатыр. ТЖМ мәліметінше, апат кезінде 8 мың текше метрден астам метан газы тарап, 100 тоннадан астам тау-кен үйіндісі түскен. Шахтаны тазарту жұмыстары әлі жүріп жатыр.

«Оған қоса, «АрселорМиттал Теміртау» нысандарындағы тау-кен жұмыстарына қатысты қауіпсіздік талаптарының сақталмағанын анықтадық», - дейді Төтенше жағдайлар министрі Юрий Ильин.

Оның айтуынша, реттеу жүйесіндегі қайта-қайта жасалған реформалар мен бизнес үшін талаптарды қысқарту қадағалауды әлсіретіп, салдарынан өндірістерде техногендік апаттар саны өскен.

Қазір арнайы құрылған комиссия кеншілер тарапынан қойылған талаптарға байланысты кәсіпорынмен келіссөздер жүргізіп жатыр.