Қазақстан қоржынына Азиаданың төртінші алтын медалі түсті

Қазақстанның ерлер командасы байдарка мен каноэда ескек есуден алтын алды, деп хабарлады Elorda.info.

Қазақстан құрамасының мүшелері Тимур Хайдаров пен Сергей Емельянов жұбы 500 метрге каноэда ескек есуден алтын медаль жеңіп алды. 

Біздің ескекшілер Жапония құрамасынан (1:49.237) және Ираннан келген жұптан (1:50.486) озып кетті.

Бұл Азия ойындарында Қазақстан құрамасының қоржынына түскен төртінші алтын медаль.

Тимур мен Сергейді жеңісімен құттықтаймын! Күрес қиын болды, бірақ біздің ескекшілер бәсекелестерден озып үлгерді. Азиадада Қазақстан құрамасы дәстүрлі түрде осы спорт түрінен өте жақсы нәтиже көрсетіп келеді және бүгінгі жетістік – осының жарқын дәлелі. Команданың жаттықтырушылар штабына ерекше алғыс айтамын. Ел сіздердің қажырлы еңбектеріңізді мақтан тұтады! - деді Туризм және спорт министрі Ермек Маржықпаев.