АҚШ ашық чемпионатында жүлделі орын алған паражүзушілеріміз елордаға оралды

Паражүзушілер АҚШ-тың ашық чемпионатында жоғары нәтиже көрсетті, деп хабарлады Elordainfo.kz.

Паражүзуден АҚШ-тың интеллектуалдық ерекшелігі бар параспортшылардың арасында беделді турнир саналатын USADSS & AWL 2024 OPEN NATIONAL CHAMPIONSHIP бәсекесінде астаналық Валерий Югай мен Алпамыс Әмір бақ сынады. Жарыстың қорытындысы бойынша, 17 & Under санатында бақ сынаған Валерий Югай еркін жүзу сайысында 3 алтын, 1 күміс иеленсе, Алпамыс Әмір 18 & Over санатында 3 қола жүлде жеңіп алды.

«Былтыр Францияда өткен атақты Virtus додасында паражүзушілеріміз нәтижелері төмен болып, жүлделі орыннан уақытымыз алшақ болып еді. Сондықтан бір жылдың ішінде АҚШ-тағы ашық чемпионатта осынша жүлде болады деп күтпедік. Оның үстіне паражүзуден интеллектуалдық ерекшелігі бар жандарға да көңіл аударылып жатқанына көп жыл болмады. Жоғары нәтижеге бапкер, федерацияның ұйымшылдығының арқасында жеттік», - деді паражүзуден жаттықтырушы Сайлаубек Ернұр.

АҚШ-та ұйымдастырылған ашық чемпионатта Қазақстаннан бөлек, АҚШ, Канада, Колумбия, Мексика, Жапония, Португалия, Аустралия, Польша елдерінен 100-ге жуық параспортшы жүлдеге таласты.

Енді отандастарымыз 2025 жылы Таиландта Virtus әлем чемпионаты мен Өзбекстанда өтетін жасөспірімдер арасындағы пара Азия ойындарына дайындалатын болады.