Головкиннің Альварестен кейінгі қарсыласы кім екені белгілі болды

Бүкіләлемдік бокс ұйымы (WBA) Геннадий Головкинді WBA белбеуінің иегері Эрисланди Ларамен кездесуге міндеттеді.

Головкин Альвареске қарсы үшінші жекпе-жектен кейін 120 күн ішінде Эрисланди Ларамен жұдырықтасуы керек.

Егер GGG орта салмақта қалуды шешсе немесе Канелодан ұтылса, ол мексикалықпен өтетін жекпе-жектен кейін 120 күн ішінде орта салмақтағы «суперчемпион» атағын Эрисланди Ларамен кездесуде қорғауға мәжбүр болады, - деп жазды ESPN инсайдері Коппинджер.

Айта кетейік, Головкин мен Канелоның үшінші жекпе-жегі суперорта дивизионда өтеді. Бұл кездесуде мексикалықтың барлық белбеуі сарапқа салынады.

Головкин мен Альварес арасындағы трилогия бұл жолы да T-Mobile Arena кешенінде өтеді. Бұл аренада олардың алдыңғы екі жекпе-жегі өткен болатын: алғашқысы (2017 жылы) даулы түрде тең нәтижемен аяқталған, ал екінші (2018 жылы) кездесуде жеңіс мексикалықтың еншісінде кетті.