Киберполиция алаяқтық ісін жүзеге асыру үшін жүздеген sim-карта пайдаланушыларды ұстады

Киберполиция Шығыс Қазақстан облысында алаяқтар желісін жойды, деп хабарлады Elordainfo.kz Polisia.kz-ке сілтеме жасап.

«Шығыс Қазақстан облысы полиция департаментінің киберполиция қызметкерлері ҰҚКД және прокуратурамен бірлесіп, Өскемен қаласында үш мекенжайдан 489 sim-карта орнатылған 22 sim-box құрылғысын, 452 USB-интернет модемін, 13 компьютер, 4 роутер және бір ноутбук тәркіледі. Заңсыз іс-әрекетi үшін қаланың үш тұрғыны ұсталды», - деді ІІМ киберқылмысқа қарсы іс-қимыл департаментінің бастығы Жандос Сүйінбай.

Оған қоса, Қарағанды қаласында шетел азаматы ұсталып, одан 128 слоты бар sim-box құрылғысы, екі мыңға жуық sim-карта, екі Wi-fi роутері және сигнал күшейткіш тәркіленді.

Ұсталғандардың барлығы уақытша ұстау изоляторына қамалды.