Алматы облысында BMW көлігі үйдің төбесіне құлады (ФОТО)

Алматы облыстық Полиция департаментінің мәліметінше, жол апаты 24 мамырға қараған түні Іле ауданы Боралдай ауылында болған.

Жүргізуші - 29 жастағы жергілікті тұрғын, ол көлікті басқара алмай, жолдан ұшып кетті. Автокөлік жеке тұрғын үй ғимаратының төбесіне түсіп, газ құбырының доғасын зақымдады, сондай-ақ электр сымдары бар бағанды құлатты, - делінген хабарламада.

Жеңіл жарақат алған жүргізуші ауруханаға жатудан бас тартқан.

Құқық бұзушы ҚР ҚК 610-бабы («Көлiк құралын, жолдарды, жол және өзге де құрылыстарды немесе өзге де мүлiктi зақымдап, материалдық залал келтiруге әкеп соққан көлiк құралы жүргізушілерінің жол қозғалысы ережелерін бұзуы») бойынша әкімшілік жауапкершілікке тартылады, - деді полиция.

Келтірілген шығын әлі есептеліп жатыр.