Астаналық Қоғамдық тамақтандыру және сервис колледжі студенттері оқуларын Германияда жалғастыра алады

Президент еліміздің кадрлық әлеуетін дамыту үшін биылғы жылды «Жұмысшы мамандықтар жылы» деп жариялады. Кәсіптік білім берудің дамуының маңызды бағыттарының бірі — дуалды білім беру жүйесі. Дуалды білім беру – бұл теория мен практиканы үйлестіре отырып, студенттердің білімін өндіріс орындарында, нақты жұмыс жағдайында шыңдауға мүмкіндік беретін оқыту әдісі. Осыған орай елордалық Қоғамдық тамақтандыру және сервис колледжінде «Дуалды оқыту интеграциясы: серіктестіктердің диалогы» атты дөңгелек үстел өтті, деп хабарлады Elordainfo.kz.

Жиын барысында кәсіби білім беру саласындағы халықаралық ынтымақтастықты дамыту мәселелері қарастырылды. Бұл студенттерді жоғары білікті мамандарға айналдыруға, оларды тек Қазақстанда ғана емес, халықаралық деңгейде де сұранысқа ие етуге көмектеседі. FAV Service gGmbH компаниясы және Сауда-өнеркәсіп палатасымен дуалды оқыту бойынша Тюрингияда (Германия) жүргізілетін жұмыстар талқыланды. Форум колледж студенттеріне Германияда білім алуды жалғастыру мүмкіндігін ұсынып, оларға тегін оқу (стипендия беріледі) және неміс дипломын алу мүмкіндігін береді, сондай-ақ халықаралық мансап құру мүмкіндіктерін ашады.

Бұл келісімдер студенттерге тек кәсіби білім ғана емес, сонымен қатар әлемдік деңгейде тәжірибе жинау, білімдерін арттыру және түрлі мәдениеттермен танысу мүмкіндіктерін ұсынады.

FAV Service gGmbH мен колледж арасында ынтымақтастық туралы келісім және Эрфурт Сауда-өнеркәсіп палатасы мен колледж арасындағы өзара түсіністік меморандумына қол қою рәсімі өтті. Бұл келісімдер студенттерге Германияда практикалық тәжірибе алу және кәсіби біліктілігін халықаралық деңгейде жетілдіру мүмкіндігін беретін жаңа бағдарлама жолдарын ашады.

Осындай ауқымды шаралар білім беру мен кәсіби дайындық деңгейін арттыруға, еліміздегі мамандықтарды дамытуға, студенттерді әлемдік деңгейде бәсекеге қабілетті етіп дайындауға бағытталған. Колледж студенттері Германияда оқу арқылы болашақта халықаралық аренада өз орындарын табады, сондай-ақ Қазақстанның білім жүйесіне қосымша серпін берері сөзсіз.