Қарттар үйіндегі ата-ананың шығынын балалары көтеруі керек – депутат

Қоғамда ата-анасына салқын қарайтын безбүйрек ұл мен тасжүрек келіннің көбеюі алаңдатарлық мәселе. Мәжіліс депутаты Аманжол Әлтай Премьер-министрдің орынбасары Ермек Көшербаевқа жолдаған депутаттық сауалында қарттар үйін паналауға мәжбүр болған қариялардың шығынын балаларының табысынан ұстап отыруды ұсынды, деп хабарлады Elordainfo.kz.

«Қартайған шағында іштен шыққан өз баласына өгей болған ата-аналар қарттар үйінде өмір сүруге мәжбүр. Бұл – біздің ұлттық құндылықтарымызға сай емес. Ата-ананың алдындағы перзенттік парызды заңмен бекітуіміз қажет», – деді депутат.

Еңбек және халықты әлеуметтік қорғау министрлігінің мәліметінше, елімізде 45 мемлекеттік қарттар үйі бар, онда 5,9 мың егде жастағы адам тұрады. Ал жеке орталықтарда орын тапшылығы байқалуда.

Депутат әлеуметтік желілер мен батыстық мәдениеттің ықпалы жастардың отбасылық жауапкершілігін төмендетіп жатқанын атап өтті.