Көңілді старттар мен шеберлік сабақтары: Астанада жаңа жылдық ойын-сауық басталды

Бүгін елордада жаңа жылдық мерекелік бағдарламалар басталды, деп хабарлады Elordainfo.kz елорда әкімдігінің ресми сайтына сілтеме жасап.

Елорданың алты ауданында орналасқан мұз айдындары, сырғанақтар, безендірілген шыршалар, сонымен қатар жаңа жылдық жәрмеңкелер, концерттік бағдарламалар, фотоаймақтар қала тұрғындарының қуанышына айналып үлгерді.

«Сарыарқа» ауданындағы қалалық алаңда жаңа жылдық бағдарлама сағат 12.00-де басталып, 14.00-ге дейін жалғасты. Қала қонақтары мен тұрғындары үшін кәсіби хоккейшілердің қатысуымен шайбалы хоккейден шеберлік сабағы, сонымен қатар шығармашылық ұжымдардың қатысуымен концерттік бағдарлама ұйымдастырылды.

«Алматы» ауданында Тәуелсіздік даңғылы бойындағы Оқушылар сарайының аумағында сағат 12.00-де балалар шығармашылық ұжымдарының қатысуымен мерекелік концерттік бағдарлама басталып, 13.00-ге дейін жалғасты. 

«Нұра» ауданында «Астана Арена» стадионының автотұрағында арнайы сыйлықтары бар мерекелік іс-шаралар сағат 12.00-де басталып, 13.00-ге дейін жалғасты. Сағат 15.00-ден 16.00-ге дейін мәнерлеп сырғанаудан шеберлік сабағы, 19.30-дан бастап эстафеталық жарыстар мен концерттік бағдарлама жалғасын табады.

«Сарайшық» ауданындағы «Қазақ елі» монументі жанындағы алаңда мерекелік іс-шара сағат 14.00-де басталады. Іс-шара қонақтары көңілді старттарға қатысып, сыйлықтар ұтып ала алады. Сонымен қатар 18.00-ден 20.00-ге дейін эстрада жұлдыздары мен шығармашылық топтардың қатысуымен концерттік бағдарлама өтеді.

«Есіл» ауданының ЭКСПО аумағында мерекелік бағдарлама сағат 16.00-ден 18.00-ге дейін жалғасып, көрермендер үшін шайбалы хоккейден шеберлік сабағы, жүлделі спорттық эстафеталар мен концерттік бағдарлама ұйымдастырылады.

Естеріңізге сала кетейік, аталмыш орындарда сырғанақтар, конькилерді жалға алу орындары мен фотоаймақтар бар.