Футболдан Қазақстан құрамасы Солтүстік Ирландияны жеңді

Фото: akorda.kz

2024 жылғы Еуропа чемпионатының іріктеу кезеңі аясында Қазақстан құрамасы Солтүстік Ирландияны қабылдады, деп хабарлады Elorda.info.

Қазақстан мен Солтүстік Ирландия командаларының арасындағы футбол матчында ұлттық құраманы қолдау үшін «Астана Арена» стадионына Мемлекет басшысы Қасым-Жомарт Тоқаев келді.

Футболдан Қазақстан құрамасы Еуро-2024 іріктеуінде алтыншы тур ойынын өткізді. Футболшыларымыз жеңіске деген жігер танытып, қарсыласын 1:0 есебімен жеңді.

Матчтағы жалғыз голды бірінші таймда Максим Самородов соқты. Бұған дейін «Ақтөбе» клубының сұрмергені Словенияға қарсы ойында да көзге түскен еді.

Алты турдың қорытындысы бойынша ұлттық құрамамыз 12 ұпай жинады. Ал Солтүстік Ирландияның үш ұпайы бар.

Президент Қазақстан ұлттық құрамасын Еуро-2024 чемпионатының іріктеу кезеңінде Солтүстік Ирландия командасымен өткен матчтағы жарқын жеңісімен құттықтады.