Елордада оқушылар арасындағы зорлық-зомбылықтың алдын алу мәселелері талқыланды

Достық үйінде «Оқушылар арасындағы қатыгездік пен оны жеңу жолдары» тақырыбында сараптамалық кеңестің кезекті отырысы өтті, деп хабарлады Elordainfo.kz.

 Астана қаласы бойынша Адам құқықтары жөніндегі өкілдіктің ұйымдастыруымен өткен кездесудің негізгі мақсаты – оқушылар арасындағы зорлық-зомбылықтың алдын алу мәселелерін талқылау болатын. Отырыс барысында оқу орындарында балалардың қауіпсіздігін қамтамасыз ету және зорлық-зомбылықтың алдын алу бағытында ұжымдық және жеке жауапкершілікті арттыру мәселелері қаралды. Сондай-ақ, қазіргі уақытта мектептерде орын алып жатқан буллингтің себептері мен салдары зерттеліп, алдын алу шаралары мен заңнамалық бастамалар ұсынылды.

«Астана қаласының Білім басқармасы тарапынан «STOP - буллинг» жобасы аясында барлық мектептерде 10-18 жас аралығындағы балаларды буллинг пен басқа да зорлық-зомбылықтан қорғау мақсатында алдын алу шаралары қабылданғаны белгілі. Осы жоба аясында қала мектептерінде оқушылар арасында анкеталау жүргізіліп, қатыгездік, буллинг, қорқытып алу сияқты жағдайлардың алдын алу бойынша зерттеу жұмыстары жүргізілді.

Аталған жоба аясында, Астана қаласының барлық мектептерінде оқушыларға арналған анкеталар таратылды. Бұл анкеталау оқушылардың мектепте өздерін қалай сезінетіні, басқа оқушылар тарапынан қандай қысым көріп жатқаны туралы мәліметтер жинауға бағытталған. Алғашқы кезеңде 107 928 оқушы қатысса, екінші кезеңде 107 191 оқушы зерттеуге қатысты. Анкеталар 99 мемлекеттік мектепте таратыла отырып, балалардың қауіпсіздігін қамтамасыз ету мақсатында маңызды ақпараттар жинақталған.

Қазіргі кезде оқушылар арасындағы қатыгездік тек мектеп ішіндегі жағдаймен шектелмей, әлеуметтік желілерде де орын алатын жағдайлар жиі кездеседі. Бұл да өз кезегінде буллингтің таралуына ықпал етіп, оқушылардың психологиялық денсаулығына зиян келтіреді. Сондықтан білім беру мекемелерінде қауіпсіздік шаралары мен психологиялық қолдау қызметтері де күшейтілгені жөн», - деді ҚР Адам құқықтары жөніндегі уәкілдің Астана қаласы бойынша өкілі Баян Жалмағанбетова.

Кеңес нәтижесінде Астана қаласының Адам құқықтары жөніндегі өкілдігі алдағы уақытта кәмелет жасқа толмаған балалар арасындағы зорлық-зомбылықтың алдын алу бойынша кешенді іс-шаралар жоспарын әзірлеу мен енгізу туралы шешім қабылдады.