Елордада көпбалалы аналарға ордендер табысталды

Елордалық Нұра ауданында алғаш рет көпбалалы аналарға ордендер табысталды, деп хабарлады Elorda.info.

Ел Президентінің Жарлығымен жаңа ауданда алғаш рет көпбалалы 12 әйел мемлекеттік марапатқа ие болды. Олардың бірі 7 баланы тәрбиелегені үшін «Алтын алқа» алды, қалған аналар 6 баланы тәрбиелегені үшін «Күміс алқаға» қол жеткізді.

Нұра ауданының әкімі Жүсіп Жұмағұлов аналарды ордендерімен құттықтады.

Бүгін табыстап жатқан медальдар – сіздерге алғысымызды білдірудің бір мүмкіндігі. Біздің ортақ болашағымыз сіздер күнбе-күн беріп жатқан тәрбиеге байланысты. Сіздерге алғысымды білдіремін! - деп атап өтті ол өз сөзінде.

Айта кетейік, Қазақстанда «Алтын алқа» және «Күміс алқа» мемлекеттік наградалары 1996 жылдан бастап беріледі.