Астананың туристік әлеуеті Ыстанбұлда өткен форумда таныстырылды

Қазақстанның Ыстанбұлдағы Бас консулдығының бастамасымен және Түркияның туристік агенттіктер қауымдастығының (TÜRSAB) қолдауымен ұйымдастырылған Қазақстанның, оның ішінде Астананың туристік мүмкіндіктері жөнінде форум өтті, деп хабарлады Elordainfo.kz Астана қаласы әкімдігінің ресми сайтына сілтеме жасап.

Іс-шараға 100-ден астам туроператор, туризм саласының өкілдері және Ұлттық авиатасымалдаушылар қатысты. Форум Қазақстанның Түркиядағы туристік бағыттарын ілгерілету және іскерлік байланыстар орнату үшін маңызды алаңға айналды.

Қазақстанның Ыстанбұлдағы Бас консулы Нұриддин Аманқұл Қазақстан мен Түркияның терең тарихи және мәдени байланыстарды біріктіретінін атап өтті. Екі ел де түркі әлемінің бір бөлігі болып саналады, бұл ортақ дәстүрлер мен мәдени мұрадан көрінеді. Бұл туризм саласындағы ынтымақтастықты нығайтуға да ықпал етпек.

Форумда республикалық маңызы бар Астана, Алматы және Шымкент қалалары, сондай-ақ үш облыс: Маңғыстау, Түркістан және Шығыс Қазақстан облыстары ұсынылды. Форумға қатысушылар осы өңірлердің мәдени және табиғи байлығымен, сондай-ақ олардың туристік әлеуетімен танысты.

Түркия Саяхат Агенттіктері Одағы (TÜRSAB) туризм бойынша мамандандырылған бөлімінің төрағасы Орхан Санджар Қазақстанның түрік туристері үшін тартымды бағыт ретінде дамуының маңыздылығын тоқталып, бұл бағыттың туристік ағымды ұлғайту үшін зор әлеуеті бар екенін атап өтті.

Таныстырылымнан кейін B2B-кездесулер өтті, онда туроператорлар ынтымақтастық мәселелерін және туристік пакеттердің ықтимал форматтарын талқылады. Талқылау қолданыстағы ұсыныстарды да, туризм саласында бірлесіп жұмыс істеудің жаңа мүмкіндіктерін де қамтыды.