Астанада «Шабыт» XXVIII Халықаралық шығармашыл жастар фестивалі өтеді

Астана қаласында 18-22 қараша күндері «Шабыт» XXVIII Халықаралық шығармашыл жастар фестивалі өтеді, деп хабарлады Elordainfo.kz.

Бұл – Қазақстандағы ең ірі мәдени іс-шаралардың бірі болып саналатын, әлемнің түкпір-түкпірінен келген талантты жас әртістердің, суретшілер мен ақындардың басын қосатын беделді фестиваль.

«Шабыт» фестивалінің мақсаты – дарынды жастарды қолдау және дамыту, кәсіби шеберлікті арттыру, ұлттық және әлемдік мәдениетті насихаттау, сондай-ақ халықаралық шығармашылық ынтымақтастықты нығайту.

Қатысу шарттары:

Фестивальге 18 бен 35 жас аралығындағы шығармашыл жастар қатыса алады: өнер бағытындағы оқу орындарының студенттері мен түлектері, филармониялар, театрлар мен концерттік ұйымдардың кәсіби орындаушылары. Әр қатысушы тек бір номинация бойынша өтінім бере алады.

Өтінімдер 2025 жылы 5 қараша күні сағат 18:00-ге дейін (Астана уақытымен) қабылданады.

Номинациялар:

1. Камералық хор. Хор дирижері

2. Академиялық ән айту және концертмейстерлік шеберлік

3. Камералық музыка (скрипка, альт, виолончель, контрабас, фортепиано)

4. Фольклорлық ансамбль (2-5 қатысушы)

5. Эстрадалық вокал (дуэт, трио)

6. Бейнелеу өнері (кескіндеме, графика)

7. Поэзия (үздік әдеби шығарма)

8. Креативті бағыт

Сыйақы қоры:

Гран-при – 3 000 000 теңге

I орын – 1 000 000 теңге

II орын – 750 000 теңге

III орын – 500 000 теңге

«Шабыт» фестивалі – жаңа есімдердің бастау алаңы, шабыт пен шығармашылықтың қайнар көзі, Қазақстан мен әлем жастарының бірлігін білдіретін мәдени бренд.

Ұйымдастырушылар:

ҚР Мәдениет және ақпарат министрлігі;

Астана қаласы әкімдігі;

«Мәдени іс-шараларды өткізу дирекциясы» ШЖҚ ГККП;

Күләш Байсейітова атындағы Қазақ ұлттық өнер университеті (ҚазҰӨУ).

Толық ақпаратты shabyt2025.kz ресми сайтынан білуге болады.