Астанада күрес түрлерінен ересектер арасындағы Азия чемпионаты өтеді

Фото: ашық дереккөзден

Елордадағы Жақсылық Үшкемпіров атындағы Жекпе-жек сарайында 9-14 сәуір аралығында грек-рим, еркін және әйелдер күресінен ересектер арасындағы Азия чемпионаты өтеді. Чемпионаттың ресми ашылу салтанаты 9 сәуір сағат 17:00-дe болады. Күн сайын күндізгі сессия сағат 11.00-де (алдын ала, жартылай финалдық және жұбаныш белдесулер), кешкі сессия 18.00-де (1-ші және 3-ші орындар үшін финалдық ойындар) басталады.

Азия чемпионатының бағдарламасы:

9 сәуір – грек-рим күресі – 55, 63, 77, 87 және 130 келіге дейінгі салмақ дәрежесі.

10 сәуір – грек-рим күресі – 60,67,72,82 және 97 келіге дейінгі салмақ дәрежесі.

11 сәуір – әйелдер күресі – 50,55,59, 68 және 76 келіге дейінгі салмақ дәрежелері.

12 сәуір – әйелдер күресі – 53,57,62,65 және 72 келіге дейінгі салмақ дәрежелері.

13 сәуір – еркін күрес – 57,65,70,79 және 96 келіге дейінгі салмақ дәрежесі.

14 сәуір – еркін күрес – 61, 74, 86, 92 және 125 келіге дейінгі салмақ дәрежелері.

Күрестің әр түрінен 10 медаль жиынтығы ойнатылады (барлығы 30 салмақ дәрежесі).

Алғаш рет Азия чемпионаты 1979 жылы тек еркін күрестен өтсе, екі жылдан кейін грек-рим күресінің балуандары Сары құрлықтағы мықтыларды анықтады. Әйелдер күресінен Азия чемпионаты 1996 жылдан бері өткізіліп келеді.

Қазақстан балуандары арасындағы тұңғыш Азия чемпионы – грек-рим күресінен еңбек сіңірген спорт шебері Сергей Матвиенко. Қазақстанда соңғы рет ересектер арасындағы Азия чемпионаты 2021 жылы Алматыда ұйымдастырылды. Өткен жылы Моңғолияда өткен Азия чемпионатында грек-рим күресінен ел құрамасы командалық бірінші орынды жеңіп алса, еркін және әйелдер күресі командалары жалпыкомандалық есепте қола жүлдегер атанды.

2022 жылғы Азия чемпиондары – Мейіржан Шермағамбет, Әлімхан Сыздықов (грек-рим күресі), Азамат Дәулетбеков (еркін күрес), Мәдина және Жәмилә Бақбергеновалар (әйелдер күресі).

Азия чемпионатында төреші ретінде қызмет ететін Қазақстандық мамандар