Елордада коммуналдық қызметкерлер күшейтілген режимде жұмыс істеп жатыр

Бүгін Астанада қар күреу жұмысына 2 148 жол жұмысшысы жұмылдырылды. Коммуналдық қызметтер күшейтілген режимде жұмыс істеп жатыр, деп хабарлады Elorda.info.

28 ақпаннан 1 наурызға қараған түні елордадан 7 мың текше метр қар немесе 508 рейс шығарылды.

Сәрсенбі күні таңертең қала көшелерінің қарын күреп, көктайғақты жою үшін 2 148 жол жұмысшысы мен мыңға жуық арнайы техника жұмылдырылды.

Ауа райының тұрақсыздығына, температураның өзгеруіне және жауын-шашынға байланысты көшеде көктайғақ пайда болды. Азаматтардың емін-еркін жүруі үшін жолдарға, тротуарлар мен көшелерге құм-тұз қоспасы себіледі. Бұл ретте елорда тұрғындары мен қонақтары көктайғақ кезінде қауіпсіздік ережелерін сақтап, абай болу керек, – делінген хабарламада.

Қыс мезгілі басталғалы бері қаладан 3,6 млн текше метрден астам қар немесе 290 мыңнан астам рейс шығарылды.