«Электросамокатты жүргізе аласыз ба?»: Елордада оны тегін үйренуге болады

Нұр-Сұлтан қаласында Whoosh кикшерингтік сервисі электр самокатын жүргізу мектебін ұйымдастырды. Елордалықтар үш күн бойы электросамокатты қауіпсіз және әдепті жүргізудің негізгі қағидалары бойынша тегін оқуға мүмкіндік алды, деп хабарлады Elorda.info.

Тәжірибелі нұсқаушылар кәмелетке толған барлық елордалыққа қалалық электросамокатты дұрыс және қауіпсіз пайдалануды үйретіп жатыр.

Оқи отырыңыз: Елордадағы электр самокат: Jet әлде Whoosh?

Қалалық электросамокат барлық стандартқа сәйкес келе ме

Электросамокат ірі қалаларда қозғалыс құралы ретінде танымал болды. Бірақ қала тұрғындары мен қонақтары әлі де электр самокатпен қалай дұрыс қозғалу керек екенін біле бермейді. Тек бір адамға ғана арналған көлік құралында бір мезетте екі адамның қозғалуы жиі кездеседі. Бұл электросамокаттың істен шығуына немесе адам денсаулығына қауіп төндіретін жағдайға алып келеді. Электр самокатын балаларға басқаруға болмайды және жаяу жүргіншілерге кедергі жасамауы қажет.

Whoosh сервисінің баспасөз хатшысы Даниил Капцан пайдаланушылар арасында жиі кездесетін тәртіп бұзушылық туралы айтты.  

Электросамокатта бір мезетте екі адамның жүруі өте қауіпті. Бұл басқару жұмысын едәуір төмендетеді, денсаулыққа қауіп төну ықтималдылығы жоғары. Бүгінде кикшерингтік компания екі адамның жүруін шектеу мақсатында жаңа технология ойлап табуда. Біз үш күн бойы тұрғындарға барлық ережелерді түсіндіреміз, - дейді Даниил Капцан.

Самокат жүргізу мектебінде нұсқаушылар самокаттың құрылымын, сапарды қалай бастау, электр самокатында қай жерде қозғалмау қажеттігін, төтенше жағдайларда қалай әрекет ету керек және сапарды қалай аяқтау керектігін түсіндіріп жатыр. Түсіндіру жұмысы шамамен 10-15 минутты алады.Тегін самокатпен қозғалу мүмкіндігі бар.

Бірінші күні елорда тұрғындарының қызығушылығы байқалды. Курсты әртүрлі жастағы қала тұрғындары өтті. Қала тұрғыны Альмира Оразбаева нұсқаушылар көмегімен электр самокатпен қозғалуды үйренгенін жеткізді.

Әдетте көшеде самокатты көргенде, қосымшаға тіркелу қиын деп ойлайтынмын. Жүргізу де қауіпті деп ойлағанмын. Бүгінгі тегін мектепте барлығын түсініп алдым. Қала тұрғындарына нағыз керекті іс-шара болды. Әйтпесе тұрғындар көп түсіне бермейді ғой, - дейді қала тұрғыны.